Ҳуқуқбузарликлар профилактикаси жамият осойишталиги учун ҳамиша энг муҳим соҳалардан бўлиб келган. Мазкур мақолада ҳуқуқбузарликларнинг олдини олишда энг муҳим амалий қисм — профилактика инспекторларининг фаолиятида девиант хулқ-атворли кишилар билан мулоқотни ташкил этиш муҳити, суҳбат олиб бориш усуллари, хулқ-атвор ўзгаришидаги фуқароларга таъсир этиш меъёрлари ҳақида илмий хулосалар берилган. Девиант хулқ-атворли кишилар билан ишлашда нафақат психологик тушунчаларнинг мавжудлиги, балки лингвистик, маданиятлараро мулоқот борасидаги билим ҳам муҳим ўрин тутади. Айни мана шу омиллар ҳуқуқбузарликка мойил шахсларнинг фикрлаш тарзини ўзгартиришга, хулқий оғишини чеклашга шароит яратади. Мазкур тадқиқот иши хулосаларидан ҳуқуқбузарликлар профилактикаси ва жамоат тартибини сақлаш соҳаси ходимлари фуқаролар, хусусан, хулқий оғишга учраган кишилар билан мулоқот жараёнида фойдаланишлари мумкин.