Mazkur maqolada jinoyat ishlari boʻyicha sud muhokamasi jarayonida taraflarning oʻzaro tortishuvini kuchaytirish, uning muhim tarkibiy qismi boʻlgan taraflar protsessual imkoniyatlaridagi tengligini taʼminlash, shuningdek, haqiqatni aniqlash jarayonida sudning oʻrnini aniqlash, uning dalillarni toʻplash, tekshirish va baholash davrida faollik darajasini belgilash masalalari ayrim rivojlangan xorijiy mamlakatlar tajribasi hamda aynan shu masalada ilmiy tadqiqot ishlarini olib borgan protsessualist olimlarning ilmiy qarashlari asosida tahlil oʻtkazilgan. Shuningdek, maqolada birinchi instansiya sudi majlisida jinoyat ishlarini koʻrib chiqishda sud tergovi bosqichining oʻziga xos oʻrni, aynan taraflarning tortishuviga asoslangan sud tergovi jarayonini takomillashtirish masalalari muhokama qilingan. Shuningdek, maqolada jinoyat protsessida sud tergovi bosqichini rivojlantirish yuzasidan xorijiy davlatlar tajribasi tahlil qilingan. Xorijiy mamlakatlardagi protsessualist olimlarning bu jarayonda sudning isbot qilish jarayonidagi oʻrnini takomillashtirish borasidagi fikrlari, amaliyotda oʻtkazilgan soʻrovnomalar natijalari, sud tergovida tortishuv prinsipining oʻziga xosligi bayon etilgan. Shu bilan birga, jinoyat ishini koʻrib chiqishda sud tergovi bosqichini takomillashtirish yuzasidan jinoyat-protsessual qonunchilikka oʻzgartirish kiritish yuzasidan tavsiya va takliflar haqida soʻz yuritilgan.