CHEGARALARARO AKTIVLARNI QAYTARISHDA GLOBE TARMOGʻINING OʻRNI: INSTITUTSIONAL TUZILISH, HUQUQIY CHEKLOVLAR VA MINTAQAVIY HAMKORLIK

Annotatsiya

Ushbu maqolada Korrupsiyaga qarshi kurashuvchi huquqni muhofaza qiluvchi organlarning global operativ tarmogʻi (GlobE Network)ning institutsional tuzilishi va uning chegaralararo aktivlarni qaytarishdagi oʻrni tahlil qilingan. Tadqiqotda doktrinal-huquqiy tahlil, GlobE, aktivlarni qaytarish boʻyicha idoralararo mintaqaviy tarmoqlar, INTERPOL va Egmont guruhining qiyosiy tahlili, shuningdek, BMTning Giyohvand moddalar va jinoyatchilik boʻyicha boshqarmasi (UNODC)ning aʼzolikka oid statistik maʼlumotlari va Mogʻulistonning aktivlarni qaytarish tajribasi ikkilamchi tahlil qilingan. Qiyosiy tahlil vakolat, axborot almashinuvi, protsessual maqom, tezkorlik hamda aktivlarni qaytarish bosqichlarini qamrab oladi. Aʼzolar safining kengayishi institutsional qamrov ortganini koʻrsatadi; Mogʻuliston keysi esa GlobEʼning mustaqil sababchilik taʼsirini (causal effect) toʻliq isbotlamasa-da, amaliyotchilar maslahati, milliy sud ishlarini yuritish va aktivlarni boshqarish oʻrtasidagi oʻzaro aloqadorlikni yoritib beradi. Maqolada norasmiy tezkor maʼlumotlar (intelligence) maqbul dalillar va ijro etilishi majburiy boʻlgan qaytarish choralaridan farqlab beriladi. Oʻzbekiston va ARIN-WCA (Markaziy va Janubiy Osiyoda aktivlarni qaytarish idoralararo tarmogʻi) uchun axborot uzatish boʻyicha aniq masʼuliyatni belgilash, axborotdan foydalanish kafolatlari, ARIN-WCAʼning GlobEʼda kuzatuvchi maqomini olishi uchun ariza berishi va axborot almashinuvini hujjatlashtirilgan protsessual natijalar bilan bogʻlaydigan 12 oylik baholash pilot loyihasini amalga oshirish taklif etiladi.